САД ја стопираат воената помош за Украина!

Вашингтон го прекинува обезбедувањето воена помош за Украина, пренесува Ројтерс, повикувајќи се на висок претставник од Белата куќа.

Информацијата подоцна беше официјално потврдена.

Одлуката доаѓа по интензивниот состанок во Белата куќа меѓу Доналд Трамп и Володимир Зеленски, каде што не беше постигнат договор за украинските ретки минерали.

Според изјавата на претставник од Белата куќа за Ројтерс, САД ја „преиспитуваат“ помошта за да се осигураат дека таа придонесува кон „наоѓање решение“.

Извор од администрацијата на Трамп за Fox News изјавил дека помошта останува замрзната додека украинското раководство не покаже „посветеност на искрени мировни преговори“.

Во меѓувреме, Трамп повторно порача дека Зеленски треба да биде „поблагодарен“ за американската поддршка. Зеленски, пак, во интервју за AP изјави дека крајот на војната е „многу, многу далеку“.

Трамп го нарече ова „најлошата изјава што Зеленски можел да ја даде“ и нагласи дека Америка нема долго да толерира ваков став.

Повеќе детали за ставот на САД во врска со војната во Украина ќе бидат познати во вторник вечер, кога Трамп ќе го одржи своето годишно обраќање за состојбата на нацијата пред Конгресот.