Страшна трагедија во Кочани: Пожар во дискотека однесе најмалку 50 животи

Најмалку 50 лица загинаа во пожар. Пожарот избувна во дискотека во Кочани. Тоа се случи ноќеска за време на концерт на позната група.

Според неофицијални информации, пожарот избувнал околу 3 часот. Причина е употреба на пиротехнички средства на концертот. На концертот присуствувале околу 1.500 луѓе.

Повредените веднаш се префрлени во болниците во Кочани и Штип.

На Клиниката за хируршки болести „Наум Охридски“ во Скопје досега се донесени 27 повредени лица.

Над 100 млади луѓе се повредени. Ова се првичните информации од екипите на Дирекцијата за заштита и спасување и Центарот за управување со кризи.

Сите надлежни служби се на терен. Вклучен е и јавен обвинител од Основното јавно обвинителство Кочани.

„Бројот на жртви и повредени се утврдува. Сè уште се преземаат дејствија и се врши увид. Јавниот обвинител на Република Северна Македонија, како и основните јавни обвинители на ОЈО Скопје и на ОЈОГОКК се на пат кон Кочани. На кочанското обвинителство ќе му бидат ставени на располагање сите капацитети на обвинителствата за итно постапување“, соопштија од Јавното обвинителство.