ДОБРА ВЕСТ: Ангел, вториот пациент од Кочани, пристигна во Скопје од лекување во Атина

Денеска попладне, Ангел, вториот пациент кој се лекуваше во странство по катастрофалниот пожар во кочанската дискотека „Пулс“, пристигна во Скопје, каде што беше пречекан од министрите за здравство, Арбен Таравари, и за надворешни работи, Тимчо Муцунски.

Ангел допатува од болница во Атина, каде што му беше укажана неопходната медицинска помош по трагедијата која однесе 59 млади животи. Неговото враќање е уште еден чекор кон закрепнувањето на сите повредени во несреќата.

Согласно утврдениот медицински протокол, по пристигнувањето, Ангел ќе биде задржан на 24-часовна опсервација во една од скопските клиники, каде што ќе бидат направени дополнителни токсиколошки испитувања. Доколку неговата состојба остане стабилна, се очекува утре да биде пуштен на домашно лекување.

Оптимизмот за понатамошно закрепнување на повредените се зголемува со најавата дека вечерва во земјата ќе пристигнат уште четворица пациенти кои беа на лекување во Шпанија, што укажува на постепено враќање на сите оние кои медицинска помош побараа во странство по кобниот пожар.