ПОНЕДЕЛНИК Е БЛАГОВЕЦ: Зошто овој ден се смета за голем празник?

Свето Благовештение, или во народот познат како Благовец, е еден од постојаните празници во православниот календар и секогаш се празнува на 7 април. Овој ден има посебно значење и се поврзува со многу народни верувања и обичаи.

Благовец се смета за голем празник, според некои дури и рамноправен со Велигден, поради што традиционално на овој ден не се работи. Исто така, е ден кога се слават имендени на лицата кои го носат името Благоја, Блаже, Благојка, Благица и други слични имиња.

Иако е посветен на Пресвета Богородица, Благовец во народното верување се поврзува со благост и добрина. Се верува дека на овој ден раните не болат, па затоа е обичај на малите деца да им се ставаат обетки.

Едно од најинтересните верувања поврзани со Благовец е доаѓањето на птиците преселници. Се верува дека на овој ден, без разлика на временските услови, ќе пристигнат штрковите, ластовичките, кукавиците, пупунците, славејчињата и други птици кои презимувале во потоплите краишта. Ова ја симболизира радоста на пролетта и новиот почеток.