ДРАМА НА НЕБОТО: Авионот на Двејн „Рок“ Џонсон откажа над океанот

Холивудската ѕвезда Двејн „The Rock“ Џонсон сподели со јавноста за неговото страшно искуство за време на лет со неговиот приватен авион. Поради проблеми со хидрауликата, авионот морал да се врати на Хаваи, непосредно по полетувањето кон Хјустон.

Актерот на социјалната мрежа „Икс“ објави видео во кое раскажува за моментите кога пилотот му соопштил дека не можат да го продолжат летот над океанот поради технички проблем. Џонсон призна дека во тие мигови се запрашал дали тоа е крајот и почнал да се моли за безбедно слетување.

„Пилотот ми рече: ‘Господине Џонсон, се извинувам што ве известувам на овој начин, но не можеме да продолжиме да летаме преку океанот. Имаме проблем’“, цитираше Џонсон, додавајќи дека во еден момент помислил: „Дали е тоа тоа? Дали вака се одјавувам?“

Тој го пофали смиреното однесување на пилотот, капетан Дејвид, кој му објаснил дека проблемот со хидрауликата е предизвикан од прегревање. Пилотот нагласил дека има проблеми кои можат да се решат во воздух, но и такви со кои не смеат да ризикуваат, особено над океанот.

Џонсон истакна дека додека седел во авионот, сам со пијалок во рака, размислувал за сето тоа и стискал палци, надевајќи се на безбедно враќање. Во тие моменти, како што рече, сфатил што е навистина важно во животот.

Рок патувал во Тексас за првиот викенд на „United Football League“, чиј коосновач е тој. Тој им се извини на фановите и на тимовите за неговото отсуство преку Твитер, изразувајќи благодарност што неговиот приватен авион „Gulfstream G650“, вреден 65 милиони долари, безбедно слетал.

„Извинете што не можам да бидам во Тексас, но благодарни што успеавме безбедно да слетаме“, напиша Џонсон на Твитер.