„Едвај ја влечев“ – Исповед на херојската мајка Лејла, која препливала 3 км за да ја спаси својата ќерка од поплавата во Босна

„Почувствував како куќата се ниша, еднаш, двапати, а на третиот удар се сруши. Ги слушав вресоците на сопругот, свекрвата и ќерката,“ раскажува Лејла Залихиќ од Босна, која пливајќи 3 километри низ надојдената вода успеала да ја спаси својата 13-годишна ќерка од катастрофалната поплава што ја погоди Јабланица.

Ноќта помеѓу четврток и петок (03-04.10), селото Долна Јабланица беше погодено од неочекувана поплава, која ја уништи куќата на Лејла и нејзиното семејство. Лејла, нејзиниот сопруг, ќерката и свекрвата беа принудени да се борат со надојдената вода, која ја поплави нивната куќа и ги раздели во хаосот.

Во својата исповед за босанските медиуми, Лејла ја раскажува борбата за живот што ја преживеала за време на оваа страшна ноќ, приказна која трогнува дури и најсилните. Таа објаснува дека сè почнало околу полноќ, кога семејството било на вториот кат од куќата. Сосед ги предупредил дека водата ќе ги поплави, па сите заедно се искачиле на третиот кат.

„Погледнавме низ прозорецот и видовме дека водата се крева. Зедов некои основни работи, како документи. Почувствувавме како куќата се ниша, и кога се сруши, веќе не знаев што се случува,“ раскажува Лејла.

Katastrofalne #poplave dijelu Bosne i Hercegovine, najteže na području #Jablanica. Tačan broj žrtava se ne zna, jer se traga nestalima.
U periodu od 3.10. poslijepodne do 4.10. prijepodne palo je 100-400mm‼️‼️ kiše ⛈️⛈️⛈️.
Koliko je palo kiše?
1/n pic.twitter.com/BlSXDwQJKe

— PulsarWX (@PulsarWX) October 5, 2024

Иако не знаела каде ја носи водата, Лејла успеала да го задржи телефонот во раце. Оваа мала среќна околност ќе ѝ помогне да го најде својот пат до ќерката, која го забележала светлото од телефонот и почнала да ја повикува.

„Ги прескокнував и туркав дрвјата и предметите што пловеа околу нас. Кога ја најдов, едвај ја влечев поради натопената облека, но успеавме да стигнеме до брегот,“ се присетува таа, додавајќи дека седејќи на брегот околу час и половина, се обидувале да одлучат во кој правец да продолжат.

Наскоро забележале младо момче на импровизиран сплав, кое ги извлекло на сигурно, по што сите тројца пешачеле низ шумата до најблиската куќа што не била поплавена.

Лејла и ќерка ѝ биле итно хоспитализирани, но стравува дека нејзината ќерка ќе носи доживотни трауми од ова страшно искуство. Нејзиниот сопруг преживеал, но за свекрвата се уште нема информации.

Strašne poplave u Jablanici odnijele najmanje pet života, grad potpuno odsječen https://t.co/y5Fn8x12Gq pic.twitter.com/j3P5OZe7EK

— BN PORTAL (@rtvbn1) October 4, 2024

Приказната за мајката херој која не се откажала пред ништо за да го спаси својот најголем дар – животот на своето дете, останува вистински пример за непокорот и храброста на една жена во лицето на природната катастрофа.