Ле Пен остро против Макрон: Испраќањето војска во Украина е „лудило“

Една од водечките пратенички на опозициската партија Национално собрание, Марин Ле Пен, остро го критикуваше предлогот за испраќање француски војници во Украина, нарекувајќи го „безумен“.

Францускиот претседател Емануел Макрон веќе една година зборува за можно ангажирање на француската војска во Украина, најпрвин како борбени единици кои би помагале на Киев, а неодамна и како сили кои би гарантирале спроведување на евентуален мировен договор.

„Испраќањето француски војници на украинско тло би било вистинско лудило“, порача Ле Пен за време на дебата во француското собрание.

Мисијата на ОН е единствено можно решение

Ле Пен нагласи дека единствената прифатлива опција би било испраќање мировни сили („сини шлемови“) во рамките на мисијата на Обединетите нации, што во моментов е невозможна без согласност од Русија, постојана членка на Советот за безбедност на ОН.

„Франција мора да ја води својата надворешна и безбедносна политика врз основа на реални интереси и факти, а не на емоционални испади и манифестации на ароганција“, истакна Ле Пен.

Отфрлена идејата за европска безбедносна иницијатива и проширување на нуклеарната заштита

Ле Пен ја критикуваше и идејата за создавање паневропска безбедносна структура без учество на САД, нарекувајќи ја „нереална и опасна“.

Таа остро го отфрли и предлогот на некои пратеници Франција да го прошири својот нуклеарен штит на Украина, предупредувајќи за ризиците од вакви потези.