Маслиново масло – половина лажица дневно го намалува ризикот од деменција

Консумирањето маслиново масло одамна се смета за корисно за здравјето, но ново истражување открива дека дури и минимална доза – половина лажица дневно – може да го намали ризикот од развој на Алцхајмерова болест за неверојатни 28 проценти.

Според истражувањето спроведено во САД, кое опфатило над 92.000 испитаници со просечна возраст од 56 години, редовното користење на маслиново масло позитивно влијае врз долгорочното здравје на мозокот. Покрај тоа, замената на маргаринот или мајонезот со само мала количина маслиново масло го намалува ризикот од смртност предизвикана од деменција за осум проценти. Научниците истакнуваат дека овие резултати се валидни независно од генетиката или останатите диетални навики на учесниците во студијата.

Она што е особено интересно е дека жените покажуваат поголема заштита од деменција отколку мажите, според оваа анализа. Маслиновото масло се истакнува поради своите антиоксидантни и антиинфламаторни својства, што го прави „течно злато“ во исхраната.

Здравствените придобивки од маслиновото масло

Познато по својот богат состав на мононезаситени масти и антиоксиданси, маслиновото масло се смета за еден од најдобрите природни извори на здрави масти. Овие состојки не само што помагаат во намалувањето на ризикот од деменција, туку се поврзани и со многу други здравствени придобивки, како намалување на ризикот од кардиоваскуларни заболувања и коронарна срцева болест.

Маслиновото масло е и важен дел од медитеранската исхрана, која е позната по својот позитивен ефект врз долголетноста и целокупното здравје. Други студии покажуваат дека консумирањето повеќе од половина лажица масло дневно може да го намали ризикот од смртност од рак, невродегенеративни и респираторни заболувања.

И покрај тоа што е дел од секојдневната исхрана, ова масло може да се користи и како природен лек за дигестивни проблеми, бидејќи помага во омекнување на столицата и подобрување на цревната функција.

Редовната употреба на маслиново масло носи бројни придобивки за здравјето, што го прави совршен додаток во секојдневната исхрана.