Мачор постојано ја буткал новогодишната елка, а нејзината сопственичка пронашла урнебесен начин како да го спречи во тоа

Откако го вдомила мачорот Виктор, сопственичката знаела дека нема да има проблеми во нивниот однос. Тој веднаш го покажал својот отворен дух и не се плашел од ништо. Но, сепак криел тајна која неговата сопственичка ја дознала сосема случајно.

Таа забележала дека Виктор сепак не е бестрашен и дека се плаши од сосема обични работи. Тој не се плаши од други мачки, не се плаши од кучиња и не се плаши од вода – Виктор се плаши од мандарини. Да, добро прочитавте, и неговата сопственичка била изненадена од ваквиот факт.

Додека седела навалена во удобниот кауч и го консумирала своето омилено овошје, мачорот побегнал во другиот ќош од собата и тоа го правел секојпат кога сопственичката го јадела “страшното овошје”.

Виктор, како и многу други мачки, обожува да ги бутка лампионите од новогодишната елка и сите останати светкави украси. Тоа често резултира со буткање на целата елка, а неговата сопственичка не можела да го спречи во намерата – сè до оваа година. Таа поставила неколку мандарини околу елката и Виктор повеќе не ѝ се приближува.

Стравот од мандарините сепак е поголем од љубовта кон лампионите, а доколку и вашата мачка се плаши од некој предмет, можете да го искористите овој генијален трик.