Никола Тесла: Од дете инспирирано од мајката до гениј што го промени светот

Животната приказна на Никола Тесла, еден од најголемите умови во историјата, започнува во малото село Смиљан, денешна Хрватска, каде што е роден една летна ноќ во 1856 година – истата ноќ кога грмотевици ја осветлувале небото.

Кога бабицата која ја породувала неговата мајка, Ѓука Тесла, забележала дека „тој е дете на бурата“, Ѓука одговорила: „Не, тој е дете на светлината.“ Оваа изјава била предзнак за судбината на малиот Никола, кој подоцна ќе стане симбол на иновациите и светлината.

Рана инспирација од мајката

Мајката на Тесла, Ѓука, била негова прва инспирација. Иако неписмена, таа била генијална во измислување практични уреди за олеснување на секојдневниот живот. Таа направила механичка маталка за јајца и кревети без нозе за полесно качување, што го поттикнало Никола уште од мали нозе да размислува како да ги подобри нејзините изуми.

Трагедијата што го променила

Кога Никола имал пет години, неговиот постар брат Дане загинал во несреќа со коњ. Оваа трагедија оставила длабоки траги врз Никола, кој одлучил да го продолжи наследството на својот брат и да стане генијалец кој ќе го прослави името на семејството.

Првите чекори кон изумителството

Никола започнал да експериментира уште како дете. Од измислување рибарски алатки до „поправање“ на новата пумпа за вода на селото, неговата љубопитност и креативност рано го издвоиле како талентирано дете.

Таткото и најважната заклетва

И покрај огромната желба да стане инженер, неговиот татко Милутин, кој бил православен свештеник, инсистирал Никола да тргне по неговите стапки. Но, откако Никола се разболел од колера и девет месеци бил прикован за кревет, неговиот татко, преплашен за животот на синот, дал заклетва дека ќе го поддржи да го следи својот сон ако оздрави.

Почетокот на генијалната кариера

Откако се опоравил, Тесла добил можност да студира инженерство, а иако никогаш не го завршил формалното образование, неговиот изумителски дух станал незапирлив.

Меѓу неговите најголеми достигнувања се:

• Наизменична струја, која го револуционизираше преносот на електрична енергија.
• Радио-таласите, основата за современите телекомуникации.
• Неонските светла, кои денес го осветлуваат светот.
• Рендгенската фотографија, радарот и далечинското управување.

Тесла ја завршил својата кариера со над 300 патенти, а неговата визија за технологијата и иднината го направи безвременски симбол на иновациите.

Поука од животот на Тесла

И покрај потеклото од мало село и живот полн со предизвици, Тесла покажал дека генијалноста и упорноста можат да го променат светот. Неговата приказна е потсетник дека инспирацијата може да дојде од најобичните места – дури и од механичка маталка за јајца.