ПО 1500 ЕВРА ЗА СЕКОЕ СЕМЕЈСТВО: Бугарскиот пратеник Пејков ја реализира донацијата за Кочани!

Бугарскиот пратеник Ангел Пејков информираше за распределбата на донациите кои ги собра за жртвите од трагичниот пожар во Кочани.

Тој објави дека по консултации со Кризниот штаб во Кочани, биле одбрани 18 семејства кои ќе добијат финансиска помош од по 1500 евра.

Пејков наведе дека на списокот има семејства со починати родители, самохрани мајки со повеќе деца, како и лица со тешки повреди.

Тој даде неколку примери на семејни трагедии кои ќе бидат поддржани со овие средства, но од етички причини не ги објави нивните имиња.

Според неговата објава, средствата веќе се префрлени на сметките на 15 од овие семејства.

За останатите три семејства се чека да се отворат банкарски сметки кои поддржуваат меѓународни трансакции, по што и тие ќе ја добијат донацијата.

Пејков исто така истакна дека останува резерва од околу 13.000 евра кои ќе бидат на располагање за поддршка на жртвите кои ќе имаат потреба од подолготрајно лекување.

Тој детално ги објави собраните донации, кои изнесуваат вкупно 77.357,40 лева, што е еквивалентно на 39.952,21 евра.

Од овие средства, веќе се префрлени 22.500 евра, а уште 4.500 евра чекаат на реализација. Остатокот од собраните средства ќе биде наменет за резервниот фонд за лекување.