Прилеп трчаше за Никодим: Ноќна хуманитарна трка обедини стотици граѓани

Во чест на Денот на ослободувањето на Прилеп, стотици жители, млади и постари, синоќа се собраа на ноќна трка за поддршка на малото момче Никодим Мидоски. Настанот, кој се одржа под покровителство на општина Прилеп, имаше хуманитарен карактер, со цел да се соберат средства за лекување на три и полгодишниот Никодим.

Трката од 5 километри започна пред познатата локација „Реклами“, а котизацијата за учество изнесуваше 200 денари, средства кои целосно ќе бидат наменети за покривање на медицинските трошоци на малото момче. Со енергија и солидарност, прилепчани се сплотија за поддршка на Никодим, претворајќи ја трката во симбол на заедништво и хуманост.