Симон Трпчески ја воодушеви публиката во Будимпешта со Mакедонска музика

Еминентниот македонски пијанист Симон Трпчески повторно ја крена европската публика на нозе, овој пат со својот настап во свечената сала на Музичката академија „Франц Лист“ во Будимпешта. Со изведба на вториот пијано концерт на Јоханес Брамс, под диригентската палка на италијанскиот маестро Рикардо Фрица и во соработка со Симфонискиот оркестар на Унгарското радио, Трпчески уште еднаш покажа зошто важи за еден од најдобрите пијанисти на Балканот.

„Се чувствувам прекрасно, особено што настапив во градот каде што ова дело за првпат беше изведено,“ изјави Трпчески. На крајот од концертот, како бис, тој ги изненади присутните со изведба на „Пиперково оро“ од својот проект „Македонисимо,“ велејќи: „Секогаш сакам да презентирам дел од нашето наследство, горд сум на македонското културно богатство.“

На концертот присуствуваа и бројни Македонци, меѓу кои и Ивица Боцевски, специјален претставник на Владата при унгарското претседателство со Европската Унија, кој истакна дека Трпчески е најголемиот културен амбасадор на Македонија.

Настапот во Будимпешта е дел од турнејата на Трпчески, која продолжува со концерти во Белград, Солун, Нови Сад и Сараево, каде македонскиот пијанист ќе го претстави македонскиот фолклор и музичко богатство на сцените низ Балканот и Европа.